जमीन विकून आलेल्या भरमसाठ पैशाचं नियोजन कसं करायचं?

जमीन विकून आलेल्या भरमसाठ पैशाचं नियोजन कसं करायचं?

‘उद्योजक मित्र’ सोशल मीडिया नेटवर्क फॉलो करा :: फेसबुकट्विटरइंस्टाग्राम

……………………………..

काही महिन्यांपूर्वी समृद्धी महामार्गात जमिनी गेलेल्या एका गावातील समृद्धीची बातमी वाचायला मिळाली होती. संपूर्ण गावात घरागणिक किमान एक फॉर्च्युनर, एंडेव्हर किंवा इनोव्हा गाडी आहे. महागड्या गाड्यांचं गाव म्हणून या गावाला चांगलीच प्रसिद्धी मिळाली. पण हा स्वतःचंच दिवाळं काढणारा प्रकार कुठेतरी, कुणीतरी थांबवणे आवश्यक आहे असे वाटले.
आता तर समृद्धी महामार्गात ज्या ज्या गावांच्य ज़मिनी गेल्यात तिथे महागड्या गाड्यांच्या कंपन्यांनी आपले विक्री प्रतिनिधी २४ तास नियुक्त करून ठेवलेले आहेत.

पुण्याजवळ करोडो रुपये घेऊन जमिनी विकलेले गुंठामंत्री कित्येक आहेत. पैसे कमी पडले कि वीक तुकडा, हा इथला नित्यक्रम झालाय. गेल्या २० वर्षात पुण्याच्या परिसरातील हजारो एकर जमिनी बिल्डर्स, कंपन्या यांना लोकांनी विकल्या, आणि आलेला सगळा पैसा राजकारण, मौजमजा यातच घालवला. आता यातले हाताच्या बोटावर मोजता येतील इतकेच टिकलेत, बाकीचे दिवाळखोर झालेत. एखाद्या कंपनीच्या बाहेर, चौकात, लहानश्या चहाच्या टपरीवर आता यांची गुजराण चालते.

नगरमधील शिर्डी ला विमानतळासाठी ज्यांच्या जमिनींचे अधिग्रहण झाले ते काही काळासाठी प्रचंड श्रीमंत म्हणून वावरले, पण पैसे संपल्यावर आता पुन्हा मजुरीच्या कमला लागले आहेत.

महाराष्ट्रातील जवळजवळ सर्वच जिल्ह्यातील हि परिस्थिती सारखीच आहे. जिथे जिथे शहराजवळ विकास होत आहे, MIDC सॅंक्शन होत आहेत, रस्त्यांसाठी अधीग्रहण होत आहे, तिथे तिथे जमीन मालक काही काळासाठी प्रचंड श्रीमंत होताना दिसत आहेत, पण दहा वर्षाच्या कालावधीतच हे चित्र पूर्णपणे उलट दिसत आहे. दहा वर्षापूर्वीचे पैशाच्या राशीत खेळणारे आता घरखर्चासाठी उधाऱ्या मागत फिरताना दिसत आहेत.

काय कारण आहे या दिवाळखोरीचे? जमिनी विकून आलेला भरमसाठ पैसा पाच दहा वर्षात कुठे गडप होतोय? याचा कुणी विचार करायचा तरी विचार केलाय का?

याच सर्वात मोठं कारण आहे अर्थसाक्षरतेच अभाव… आर्थिक साक्षरतेचा प्रचंड अभाव आपल्या दिवाळखोरीला कारणीभूत ठरत आहे.

जमीन विकायची नसते, राखायची असते… खरंय ना… कारण जगात काहीही वाढू शकतं, पण जमीन वाढू शकत नाही. पण काही वेळेस जमिनी विकाव्याच लागतात. अशावेळी या जमिनी विकून आलेला पैसा कसा वापरायचा, त्याचे नियोजन कसे करायचे, कुठे गुंतवायचा, किती खर्चायचा, किती वापरायचा याच कोणतंतरी नियोजन आपण केलेलं असतं का? मुळात, असं काही नियोजन असतं का, हाच आपल्याला मोठा प्रश्न पडेल…

आता मुद्द्यावर येऊ… काय चुकतंय ?

आपण दिसणाऱ्या श्रीमंतीला महत्व देतोय, आणि असणाऱ्या श्रीमंतीला विसरतोय हि आपली सर्वात मोठी घोडचूक ठरत आहे.

जमिनी विकून हाती पैसा आला म्हणजे श्रीमंती अली असा एक मोठा भ्रम समाजमनात पसरलेला आहे. जमिनी विकून श्रीमंती येतंच नाही. फक्त आपल्या अचल संपत्तीचे रूपांतर चल संपत्तीत झालेले असते इतकाच बदल होत असतो. जमीन विकण्यापूर्वी तुम्ही जेवढे श्रीमंत असता, तेवढेच तुम्ही जमीन विकल्यानंतर असता. उलट आपल्या चुकांमुळे आपण जमीन विकल्यानंतर श्रीमंती दाखवण्याच्या मागे लागून आपली वाटचाल गरिबीकडे करत असतो हे आपल्या लक्षातच येत नाही. जमीन विकून आलेल्या पैशाचा वापर करून आणखी पैसा निर्माण केला तरच श्रीमंती येऊ शकते हे आपण कधीच लक्षात घेत नाही.

हा पैसा जातो कुठं याचा थोडा आढावा घेऊ.
खिशात ५०० ची नोट असेल तर तिचे आपण सुट्टे करण्याचे टाळतो. सुट्टे झाले कि पैसे लवकर संपतात. त्यापेक्षा जमेल तेवढा जास्त काळ ती नोट तशीच ठेवण्याकडे आपला कल असतो. हि सवय बहुतेक मध्यमवर्गीय लोकांना आहे. हाच प्रकार इथे थोड्या वेगळ्या मार्गाने होत आहे. जमीन म्हणजे ती ५०० ची नोट आहे तर ती विकून आलेला पैसे म्हणजे सुट्टे पैसे आहेत. अतिशय चिल्लर गोष्टींसाठी हा पैसा अक्षरशः उधळला जातो.

भपकेबाजपणा, मोठमोठे बंगले बांधणे, महागड्या गाड्या घेणे, गावच्या राजकारणात प्रचंड पैसा ओतणे, मोठेपण मिरविण्याच्या नादात पैसा उधळणे, व्यसनांच्या आहारी जाणे, व्यसनांमुळे चुकीच्या संगती लागून त्यांच्यावर पैसा उधळणे, अशा विविध कारणांमुळे पैसा संपत जातो. प्रत्येकवेळी आणखी खूप शिल्लक आहे असं वाटत राहतं. पण तो हळूहळू कमी होत आहे हे आपल्या लक्षातच येत नाही.

थोडक्यात काय… तर चार वर्षांपूर्वीचा श्रीमंत आता पुन्हा आपल्या मूळ रूपात आलेला असतो. पण आता उपजिवीकेच साधन असणारी जमीनही नसते, आणि ती विकून आलेला पैसाही नसतो…

आपल्याला रोख पैशाचं प्रचंड आकर्षण आहे. पण खऱ्या संपत्तीचं आकर्षण बिलकुल नाही. जमीन आणि ती विकून आलेला पैसे यातली जमीन हि मोठी संपत्ती आहे, रोख पैशाचा मूल्य जमिनीपेक्षा कमी आहे हे आपण लक्षात घेत नाही. पण हा रोख पैसा हातात आला कि आपण अधाशासारखा तो खर्च करत सुटतो. त्यातून नवीन संपत्ती निर्माण करण्याचा आपण कधीच प्रयत्न करत नाही. किमान उत्पन्नाचे काही स्रोत निर्माण करावे असा कधी आपण विचार करत नाही. याचाच परिणाम आपण पूर्वीपेक्षाही जास्त बिकट अवस्थेकडे मार्गक्रमण करत जातो.

काय करावं? जमिनी तर विकाव्याच लागणार आहेत. मग आलेल्या पैशाचं नियोजन कसं करावं?
याची उत्तरं थोडक्यात पाहुयात…

  • सर्वात महत्वाचे म्हणजे रोख पैसा आला म्हणजे आपण श्रीमंत झालो हा भ्रम दूर करावा. तुम्ही कालच्याएवढेच आज श्रीमंत आहात उलट आता गरीब होण्याची शक्यता जास्त आहे हे लक्षात घ्या.
  • जमीन विकून आलेला पैसा लगेच कुठेतरी गुंतवून ठेवा. अगदी त्यातला रुपया सुद्धा खर्च करायचा नाही हे ठरवून घ्या. खूपच झालं तर जास्तीत जास्त ५% रक्कम काही महत्वाच्या कामांसाठी खर्च करू शकता. माझ्या एका नातेवाईकाला समृद्धी महामार्गाचे सहा सात कोटी रुपये मिळाले आहेत. त्यांना स्पष्टपणे सांगून ठेवले आहे कि हा पैसा लहेच कुठेतरी गुंतवा. या पैशातून शहराजवळ शेतजमीन, शहरात फ्लॅट, शॉप, घेऊन ठेवा. अति निकड असेल तरच थोडाफार पैसा खर्च करा. पण तो आलेल्या पैशाच्या ५% पेक्षा किंवा दहा वीस लाखापेक्षा जास्त नसावा.
  • जमीन विकून आलेला पैसा हा तुमचे उत्पन्नाचे स्रोत वाढवण्याची सुवर्णसंधी आहे हे लक्षात घ्या. हा पैसा अशा ठिकाणी गुंतवा कि तेथून तुम्हाला कायमस्वरूपी उत्पन्न मिळायला सुरुवात होईल. हि गुंतवणूक एकाच ठिकाणी करू नका, वेगवेगळ्या ठिकाणी पैसे गुंतवत राहा.
  • चांगल्या लोकेशनला एक दोन शॉप किंवा फ्लॅट घ्या, ते भाड्याने द्या.
  • एखादा लहानसा व्यवसाय सुरु करा, सेल्स चा अनुभ नसेल तर शक्यतो रिटेल व्यवसाय सुरु करावेत, वर्षभरानंतर व्यवसायाचा चांगला अनुभव आल्यानंतर त्यात थोडी गुंतवणूक वाढवून व्यवसाय वाढावा, हा वर्ष दोन वर्षाने गुंतवायचा पैसा तोपर्यंत FD करून ठेवा.
  • काही पैशाचे चांगल्या कंपन्यांचे शेअर्स घेऊन ठेवा, फक्त या शेअर्स कडे पुढचे दहा वर्षे ढुंकूनही पहायचे नाहीये हे लक्षात ठेवा, याचा डिव्हीडंड तुम्हाला दरवर्षी काही ना काही उत्पन्न देत राहते. काही पैसा म्युच्युअल फंड मध्ये गुंतवून ठेवा.
  • काही माहितीतल्या व्यवसायात गुंतवणूक करा, त्यातून तुम्हाला चांगले उत्पन्न मिळत राहील.
  • शहराजवळ काही प्लॉट घ्या. त्यांचे भाव वाढत जातील. शक्य झाल्यास शेतजमीन घेण्याचा प्रयत्न करा. शहराजवळ किंवा बागायत असलेली शेतजमीन कधीही चांगली. अचानक गरज पडल्यास चांगला पैसा मिळतो.
  • गावातल्या स्पर्धेपासून अलिप्त राहा. एकमेकांना मागे टाकण्याच्या स्पर्धेत भाग घेऊ नका. इतर कुणी घरासाठी, गाड्यासाठी खर्च करत असतील तर त्यांना टक्कर देण्यासाठी तुम्ही खर्च करू नका. त्यांना आत्ता त्यांची श्रीमंती दाखवू द्या, तुम्ही दहा वर्षानंतर आजच्यापेक्षा कित्येक पटींनी जास्त श्रीमंत होण्याचे नियोजन करत राहा.
  • राजकारणापासून दूर रहा. राजकारण करायचेच असेल तर या पैशातून करू नका. त्यासाठी आधी पैसा मिळण्याचे स्रोत उभे करा आणि त्यातून हवं तर राजकारणासाठी खर्च करा. पण जमीन विकून आलेला पैशातून रुपयाही वायफळ गोष्टींवर खर्च करायचा नाही हे लक्षात ठेवा.
  • हौस मौज हि कायम मिळत राहणाऱ्या पैशातून करायची असते. जमीन विकून आलेल्या पैशातून नाही हे लक्षात ठेवा.
  • इतर जण पैशाच्या राशीत खेळत असताना, तुम्ही तो पैसा कुठेतरी गुंतवण्याचा भानगडीत पडून आपली हौस करण्याची इच्छा पूर्ण करू शकत नाही याचे वाईट वाटू शकते, पण थोडा काळ गरिबी दिसल्याने तुम्ही गरीब होत नाही, उलट तुम्ही तात्पुरत्या श्रीमंतीच्या मागे न लागत कायमस्वरूपी श्रीमंतीसाठी साखरपेरणी करत आहात हे लक्षात असू द्या.
  • आणि जर यातलं काहीच शक्य नसेल तर सरळ सगळं पैसा बँकेत फिक्स डिपॉजिट करा. वर्षाला ६-७% व्याज मिळालं तरी तो खूप पैसा होतो. यातूनही तुम्हाला बऱ्यापैकी उत्पन्न मिळत राहील, अपेक्षित असलेल्या श्रीमंतीकडे तुम्ही गेला नाही तरी यातूनही चांगलं राहणीमान तुम्ही घडवू शकता. साधं उदाहरण घ्या, एखाद् कोटी रुपये जर फिक्स डिपॉजिट केले तर ६% व्याजदराने वर्षाकाठी सहा लाख रुपये मिळतात. म्हणजे महिन्याला ५० हजार झाले. चांगले राहणीमान जगण्यासाठी हि रक्कम सुद्धा भरपूर आहे.
  • एक महत्वाचे म्हणजे, तुमच्याकडे इतका पैसा आला कि तुम्हाला तो पैसा कुठे गुंतवायचा याचे सल्ले देणारे भरपूर भेटतील. पण कुणाचेहि सल्ले न ऐकता तुम्ही स्वतःच योग्य अभ्यास करून निर्णय घ्या. कुणाच्याही सांगण्याने निर्णय घेऊ नका. नाहीतर पुन्हा मागचे मागचे पाढे पन्नास….
  • आलेला एक न एक रुपया कुठेतरी गुंतवायचा आहे एवढं एकंच लक्षात ठेवायचं आणि त्यानुसार नियोजन करायचं. हि गुंतवणूक वर सांगितलेल्या मार्गांपेक्षा वेगळीही असू शकते. पण हा पैसा कुठेतरी गुणालाच पाहिजे हे मात्र नक्की करायचं.

या काही महत्वाच्या गोष्टी लक्षात ठेवल्या आणि त्यावर योग्य अंमलबजावणी केली तर नक्कीच आलेला पैसा संपण्याऐवजी वाढण्याची सुरुवात होऊ शकते. पण जर तो पैसा खर्च करण्याच्या मागे लागलात तर औटघटकेच्या श्रीमंतीच्या मोहापायी कायमची दिवाळखोरी नशिबी येऊ शकते.

जमिनी विकून कुणीही श्रीमंत होत नसतं. जमिनी विकून आलेला पैसा योग्य ठिकाणी गुंतवला, योग्य नियोजन केले तर हि आपल्यासाठी श्रीमंतीकडे वाटचाल करण्याची एक सुवर्णसंधी आहे. या संधीच सोनं करा. या दिवाळखोरीच्या पॅटर्नपासून वाचायचे असेल तर संपत्तीचे रूपांतर पुन्हा संपत्तीतच झाले पाहिजे हा नियम काटेकोरपणे आपण पाळायला हवा. आपण दिवाळखोरीच्या पॅटर्न सोडून समृद्धीचा पॅटर्न आत्मसात करायला हवा. अर्थसाक्षरता म्हणजे काही जगावेगळं तत्वज्ञान नसून फक्त श्रीमंतीचा फॉर्मुला आहे. संपत्ती हि खरी श्रीमंती आहे, आणि या संपत्तीतून येणारा पैसा हेच फक्त तुमचे खरे उत्पन्न आणि तेच फक्त खर्च करण्याचा तुम्हाला अधिकार आहे, संपत्ती विकून येणारा पैसा हा खर्च करण्यासाठी नसून पुन्हा संपत्तीमध्येच रूपांतरित व्हायला हवा, एवढं जरी आपल्याला कळालं तरी आपल्या बऱ्याच आर्थिक समस्या सुटू शकतात.

धन्यवाद

अर्थसाक्षर व्हा…
उद्योजक व्हा…
समृद्ध व्हा…

_


श्रीकांत आव्हाड
७७४४०३४४९०

Business Consultant
www.ShrikantAvhad.com

:::::::::::::::::::::::::::::::::::::::::::

‘उद्योजक मित्र’ सोशल मीडिया नेटवर्क फॉलो करा :: फेसबुकट्विटरइंस्टाग्राम

All rights are reserved. Violation of copyright will result into legal action.
लेखनाचे सर्व हक्क राखीव आहेत. कॉपीराईट हक्कांचा भंग दिवाणी व फौजदारी कारवाईस पात्र राहील

Related Post

5 Comments

Leave a Reply

Your email address will not be published. Required fields are marked *

error: Content is protected !!